Lewensoriëntering

Persoonlike gesondheid

Behels die emosionele, geestelike, verstandelike en fisiese gesondheid van 'n individu.

KINDERMISHANDELING en GESINSGEWELD is voorbeelde hoe jou persoonlike gesondheid negatief beïnvloed kan word.

Agtergrond oor gesinsgeweld ?

Mense dink dikwels dat gesinsgeweld slegs fisiese geweld insluit, maar die dade, gedrag en gevolge wat gesinsgeweld uitmaak, wissel van aard en gereeldheid.

Dit word algemeen aanvaar dat die gesin die plek is waar ouers en kinders werklik kan groei en ontwikkel tot die mens wat elkeen veronderstel is om te wees.

Kinders leer ook in gesinsverband die rolle aan wat hulle weer eendag as ouers moet vervul. ʼn Gesin word normaalweg beskou as ʼn veilige hawe, ongelukkig is die kanse groter dat persone deur gesinslede vermoor en aangerand word as deur enigiemand buite die gesin.

Die gesinslewe word dikwels sodanig geïdealiseer dat gesinsgeweld misgekyk, of selfs as normaal afgemaak word in die daaglikse verloop van kinderopvoeding, die verhouding tussen man en vrou en selfs in die groter familiekring.(Strydom H ;2006; Gesinsgeweld en die implikasies daarvan vir die Suid-Afrikaanse samelewing)

Persone leer om gewelddadig op te tree indien hulle in gewelddadige huishoudings grootgeword het.  “.......many batterers were also observers or targets of abuse in their own families of origin.  They, too, have been left with emotional scars from long ago”.  (Decker DJ;1999:  Stopping Violence. A Group Model to Change Men’s Abusive Attitudes and Behaviors).

Gesinsgeweld word gereguleer deur die Wet op Gesinsgeweld, 1998 (Wet No. 116 van 1998). Hierdie Wet het betrekking op gesinsgeweld wat binne 'n gesinsverhouding plaasvind

Interressante statistieke van gesinsgeweld.

• Die meeste insidente vind oor ʼn naweek plaas. 

• Die wapen wat die meeste gebruik word is die vuis, met kneusings, swelsels, snywonde en breuke as die algemeenste vorm van besering. 

• Meer mans as vrouens is skuldig aan gesinsgeweld,

• vroue is ook soms oortreders en aanstigters van gesinsgeweld.

Wat word as gesinsgeweld geklasifiseer?

• Aanranding (gewone)

• Aanranding (met die opset om ernstig te beseer)

• Verbale teistering

• Seksuele teistering

• Verkragting

• Kindermishandeling wat fisiese, geestelike en seksuele mishandeling insluit

• Ontvoering

• Enige vorm van geweld soos fisiese, seksuele, emosionele of ekonomiese teistering

• Beskadiging van eiendom

• Teister agtervolging

• Betreding van iemand se eiendom sonder toestemming

• Enige vorm van beledigende of mishandelingsgedrag

• Waar sulke gedrag skadelik is of jou gesondheid, veiligheid  of welstand bedreig

• Geforseerde isolasie

• Finansiële benadeling

• Diskriminasie